Fôrtypar

Denne tabellen listar nokre vanlege typar fôr for kampfisk og andre fiskar i akvarium.

Fôr	Type	Alderen til fisken	Merknad
Infusorier (flimmerdyr)	levande	0–4 veker	Enkelt å dyrke, og ein treng ingen startkultur.
Hjuldyr	levande	0–4 veker	Litt meir næringsrike enn flimmerdyr. Treng startkultur.
LiquiFry o.l.	flytande «tørrfôr»	0–4 veker	Kan brukast som substitutt for infusorier, men er ikkje like næringsrikt.
Hardkokt eggeplomme, knust	ferskvare	0–4 veker	Pressast gjennom kaffifilter. Forureinar akvariet mykje, så fôr forsiktig og varier med andre typar fôr.
Mikroorm	levande	3 veker - 3 mnd	Rimeleg enkelt å dyrke viss du får tak i ein startkultur.
Artemia	levande/frosen/tørka	1 mnd +	Varierer i storleik; dei største er for store til yngel.
Yngel	levande	1 mnd +	Mange avlivar defekt yngel ved å fôre dei til større fisk.
Raude mygglarvar	frosen/tørka	2 mnd +	Menneske kan bli allergiske mot desse.
Kvite mygglarvar	levande	2 mnd +	Desse kan smitte kampfiskane med sopp. Sjekk at dei er livlege og soppfrie.
Kjøt/innvolar	ferskvare	2 mnd +	Må ikkje vere salta eller fulle av tilsetjingsstoff. Kuttast i passande storleik.
Hardkokt eggeplomme i bitar	ferskvare	3 mnd +	Fint å gje til vaksne fiskar i ny og ne, kanskje særleg til hoer.
Flakfôr	tørrfôr	3 mnd +	Kan knusast mellom fingrane og gjevast til 1 mnd gammal yngel.
Granulat	tørrfôr	3 mnd +	Kan knusast mellom fingrane og gjevast til 2 mnd gammal yngel.
Bananfluger	levande	3 mnd +	Hovudsakleg for vaksne fiskar og stor yngel.
Fôrtablettar	tørrfôr		Eigentleg ikkje for kampfisk. Kan likevel brukast viss fisk og eigar samarbeider litt.

Tørrfôr

Til kvardags er flakfôr eller granulat lettvint og heilt greitt for vaksne fiskar, så lenge ein varierer med litt frose eller levande fôr innimellom.

Hugs at tørrfôr i opna forpakning mistar store delar av næringsinnhaldet lenge før datoen går ut. Kjøp frå kjende produsentar, og aldri større boksar enn at du klarer å bruke dei opp innan eit halvt år.

Frosenfôr

Raude mygglarvar kan framkalle allergi hos menneske, og hos allergiske personar kan dei framkalle sterke reaksjonar. Bruk eit reiskap i staden for å røre mygglarvane med fingrane, eller vask fingrane godt etter at du har teke i dei. Unngå å stikke hendene i akvariet i nokre timar etter at du har fôra med desse.

Frosen artemia (eng.: brine shrimps) er det òg mogleg å kjøpe i akvariebutikken. Storleiken på dette fôret gjer at det stort sett passar best til vaksne fiskar.

Oksehjarte kan ein kjøpe hos slaktaren, fryse ned og raspe opp til fiskane. Ein får òg kjøpt ferdig raspa og frose oksehjarte i akvariebutikken, men det kostar sjølvsagt mykje meir. Enkelte unngår oksehjarte fordi dei meiner at fisk ikkje klarer å fordøye feittet på ein god måte.

Levande fôr

Levande mygglarvar får ein kjøpt i mange akvariebutikkar. Desse må vere av prima kvalitet (daude mygglarvar i posen er eit teikn på det motsette), elles kan dei påføre fisken sopp.

Mykje levande fôr er enkelt å dyrke sjølv. Infusorier og mikroorm er gode døme på dette. Korleis ein dyrkar infusorier og mikroorm, kan du lese om på ei eiga side om levande fôr. Artemia (eng.: brine shrimps) er små saltvassreker som er litt vanskelegare å dyrke sjølv, derfor er det vanlegare å kjøpe dei frosne i dyrebutikken.

Ferskfôr

Kampfisk kan bli svært glade for å få rester frå kjøleskapet. Dei et gjerne både fisk og slo. Dei er òg så småspiste at du kan leggje av litt frå matlaginga utan at gjestene dine må gå svoltne frå bordet av den grunn.

Ikkje gje dei for mykje kjøt eller feitt frå fuglar eller pattedyr. Pass òg på at det ikkje er salta, krydra, røykte eller fullt av konserveringsmiddel.

Variasjon

Det er lurt å variere på kosten. Men ver merksam på at viss du fôrar lenge med berre éin type fôr, for så å gå brått over til ein annan type, kan dette bli eit sjokk.